關於我們
莊會理念
「薈社之諫 ; 毅創睿思」
內務方面，我們希望能擔當校方與會員之間的橋樑，集合會員不同的意見後，把訴求傳遞給校方。我們亦會收集各會員對社科莊的意見，儘力提供最好的服務給予大家；外務方面，我們堅持我們的信念，希望能讓會員接觸多元化事務；希望能為會員培養批判性思維；希望能夠提升會員關注社會時事議題的意識，當面對不公義的事情時，各會員也能主動關心社會，勇於發聲。
取名意義
第十五屆明愛專上學院及明愛白英奇專業學校聯合社會科學院聯會二號候選內閣，由九位社會科學院基本會員組成，希望藉著堅毅的精神提升會員社會時事意識，帶動會員面對社會不公時能勇於發聲，不平則嗚。
年度外務主題
近年普世大眾對同志平權議題有比以往抱有更開放態度的趨勢；而本候選內閣的外務目的為提升會員對不同社會議題的關注：考慮到一般人普遍難以尋找到一個平台接觸性小眾，甚至對他們一知半解，故本候選內閣決定與時並進，在本年度以《性小眾》為外務主題，為會員提供了解及接觸性小眾的渠道。
你的支持對社毅很重要！
「社毅 Stanovate」為第十五屆明愛專上學院及明愛白英奇專業學校聯合社會科學院聯會二號候選內閣。社毅在此承諾若然有幸當選，定必勿忘初衷，不遺餘力為每一位會員服務！
請投二號，社毅 Stanovate！
莊員介紹
候選會長 王瑞瑜
大家好呀！我係Debbie啊！多謝黎了解我呀！好多人都問過我，點解咁chur都要做個會長，其實原因好簡單，因為我想俾個機會自己成長。雖然係明愛讀嘅時間唔長，但係對我黎講呢度已經變左我第二個家，見同學仔嘅時間仲多過屋企人~ 所以我超級希望可以籍著上社科莊為各位家人一樣嘅同學仔服務！如果有幸上到莊，我地會為大家帶黎唔同嘅活動！對我地嚟講，內外務都好重要架！對內方面，我地除左最基本希望可以將社科同學仔凝聚一齊之外，更希望可以收集各位同學嘅意見並盡所能作出改善；對外方面，我地希望可以令同學仔更了解社會發生緊咩事，更多嘅詳情將會陸續公佈架！
最後，歡迎大家可以多加留意我地嘅理念同我地嘅年度計劃書，有咩意見都可以隨時同我地講架！
請支持我地 社毅 stanovate！
候選內務副會長 林杏瑜
你問我點解year2都要上莊？
因為我想有班人可以同我一齊共同奮鬥呀！上莊絕對唔係玩，都唔係因為責任，而係我想係明愛呢個家有返個回憶。咁點解要上社科莊？ 因為我係社科人，對社科莊更加有親切感同歸屬感。
可能，明愛宜家唔係大學 ；可能，明愛設施制度都未夠完善；可能，明愛唔係最好。但，入得黎明愛，就算點都好，都係一家人。明愛呢到，最值得引以為傲既，就係呢到既人、呢到既人情味。
所以我想上內務副會長呢個位，好希望可以繼續維繫社科一家親既感覺，同時都可以為社科會員向學校表達我地既意見。我都好想可以由我地莊內開始比到一個親切感比各位會員，再由各位會員形成一個明愛社科大家庭，多謝。
最後，歡迎大家留意我地既理念同全年活動計劃，有咩意見都可以隨時同我地講，因為我地係為你地服務。
候選外務副會長 劉振嵐
大家可以叫我啊嵐~
Ocamp嘅campfire燃點左我對明愛社科嘅歸屬感，令我希望下一年能夠有份承傳明愛社科嘅火，於是我決定上莊。至於點解揀外務副會長呢個位，我覺得香港呢幾年實在太混亂，身為香港人有責任去關心自己嘅家；讀得社科，社會發生緊嘅事更加唔可以唔知！做得呢個位，我會以提高會員時事意識為目標，堅守不平則嗚、擇善固執嘅信念！最後，請大家支持我地二號候選內閣 社毅 Stanovate，多謝！
候選內務秘書 徐瀚汶
雖然我冇參加過今年嘅ocamp，但係明愛入面短短嘅一個月生活，大家都好照顧大家、互相關心互相支持。係呢度揾到屋企嘅感覺，所以我希望我可以藉住上社科莊將係呢度得到嘅嘢分享俾其他社科嘅學生， 甚至可以將呢一種精神傳承落去。咁點解我會揀做內務秘書？因為我覺得一支莊唔同嘅角色有唔同嘅作用，要靠大家一齊互相合作先會做得好。而我覺得作為一個內務秘書，除咗處理莊內各樣嘅文書事情之外，仲會係咁多莊員嘅back up，要幫手處理莊內嘅唔同事宜，而我本身比較鐘意擔當後勤之類嘅角色，所以我會揀做呢類輔助性較多嘅post去幫助我嘅莊員同社科嘅各位同學。
最後，我地係社科二號候選內閣社毅Stanovate！請多多支持我地！多謝大家！
候選外務秘書 李珈儀
大家可以叫我Rebecca~
由Ocamp到而家，享受過現莊親自搞出黎既活動之後，令我都開始有種承傳既諗法， 想為明愛社科出一分力、更加想令其他會員慶幸自己揀左明愛社科呢條路，覺得明愛係個充滿溫暖既地方。至於點解會做外務秘書？我覺得讀得社科既同學就有責任去知道返現今社會發生緊咩事。如果我地有幸上到莊，我地會透過唔同既活動 令同學有多個途徑了解返香港社會既議題。
最後，我地係二號候選內閣社毅 Stanovate！
請多多支持我地！多謝大家！
候選外務秘書 黃朗翹
大家好，我係朗翹啊！
經過今個Ocamp之後令我對明愛社科呢個地方真係有好大既歸屬感！好希望能夠係未來既日子裏面為社科同學服務，薈集大家，營造到一個互相扶持既環境。同時，我都好希望能夠透過候選社工學聯幹事會幹事呢個身位，為社科同學提供更多同其他院校同學交流既機會，擴闊眼界。最後，好希望大家能夠支持我地二號候選內閣社毅 Stanovate！
候選財政秘書 鍾炘庭
大家好，我係Mandy啊！
其實一開始我冇諗過要上莊，因為我冇去Ocamp，所以本來打算呢四年嘅大專生活就平平淡淡咁過去。慶幸嘅係有一班有志上莊嘅莊員邀請我加入佢地嘅團隊，佢地對於想上莊嘅果團火更加感動左我，令我好想同佢地一齊奮鬥。而係工作嘅時候，我對社科莊有左更多嘅了解，認識左更加多嘅社科人，令到我對社科更有歸屬感，燃點起心中嘅一團火去為社科付出更加多。講到點解我要上財政秘書一職呢？係因為我比較擅長算術方面嘅事，所以組員們都好放心將啲數比我管。再加上，做財政預算等嘅工作要做得清晰和仔細就要花上很多嘅時間，而我相信自己有能力放更多時間於財政工作上。然而，我明白後勤工作都係好重要嘅，所以如果我地有幸上莊，我會繼續努力搞好所有有關財政嘅事務，令其他莊員們可以更放心地搞好活動，而唔使咁擔心莊入面有關財政方面嘅問題。
最後 我地係社科二號候選內閣社毅 Stanovate！請大家多多支持我地！多謝大家！
候選宣傳秘書 蘇麗君
大家可以叫我Meko~
係咩驅使我想上莊呢？係愛啊！經過左社科Ocamp之後，呢到既人令我覺得明愛好温暖，亦令我產生左一份歸屬感，所以我都好希望可以將呢份温暖傳比其他社科既同學仔。另外，想做宣傳秘書既原因係因為自己從來無接觸過呢方面既工作，覺得一個活動既成功除左係有好既活動計劃之外，宣傳係另一樣好重要既事，好既宣傳可以令更加多人認識同參與活動，所以都想比個挑戰自己，嘗試突破自己！
請支持，二號候選內閣 社毅 Stanovate！
候選福利秘書 劉皓茵
大家可以叫我啊茵~
初次踏入明愛時，我覺得好陌生好害怕。
但經歷完Ocamp，比到我溫暖同愛，令我對社科有歸屬感，想搞好多不同嘅活動令到明愛社科學生有充實嘅校園生活，同時感受到滿滿嘅愛同溫暖，加強佢地嘅歸屬感，令佢地同自己嘅大專校園生活留下深刻嘅回憶。再者，希望自己係大專呢四年有一個新挑戰，希望自己可以從中成長，有所得著。然後，我會努力學習，做好福利袐書要做嘅野，幫大家爭取校內同校外嘅福利，大家如果有想爭取嘅福利都可以同我講架，我好樂意接受你地嘅意見。
請大家多多支持我地，我地係二號候選內閣社毅Stanovate，謝謝大家！
告訴我們你的期望
社毅作為校方與社科生之間的橋梁，你的意見十分重要！